Sunnd, in-ghabhaltachd agus co-ionannachd

Deagh dhàimhean agus sunnd a tha 'glè mhath'

Bidh sinn a’ toirt taic do chloinn gus am faireachdainnean agus an giùlan a thuigsinn agus a riaghladh ann an dòighean a bhrosnaicheas deagh dhàimhean, com-pàirteachadh agus in-ghabhalachd. Tha sinn a’ tuigsinn gu h-iomlan gu bheil dàimhean aig cridhe leasachadh chloinne agus nam bunait airson ionnsachadh fad-beatha agus sunnd. Tha sunnd chloinne agus theaghlaichean air leth cudromach agus aig cridhe obair an t-suidheachaidh againn.

Tha dàimhean stèidhichte air spèis, onair agus earbsa agus a bhith ga fhaighinn ceart gus builean a leasachadh do chloinn agus do theaghlaichean. Bidh sinn gu gnìomhach a’ toirt taic do ar cloinn gus a bhith sàbhailte, fallain, soirbheachail, air an altram, gnìomhach, cunntachail agus air an urramachadh agus air an gabhail a-steach. Is urrainn dhuinn sealltainn na buaidh mhòir a th’ aig seo air sunnd sòisealta, faireachdainnean agus inntinn ar cloinne, a bharrachd air an leasachadh agus an ionnsachadh.

Tha luchd-obrach a’ cur luach air gach pàiste mar neach fa leth lem pearsa, beachdan, feumalachdan agus còraichean fhèin. Bidh sinn gu gnìomhach a’ brosnachadh com-pàirteachadh chloinne ann an dòigh a tha iomchaidh a thaobh an leasachaidh. Leigidh seo le clann na beachdan aca a chur an cèill, nan dòigh fhèin, mun t-sunnd aca agus pàirt a ghabhail ann an co-dhùnaidhean a bheir buaidh orra.

Deagh dhàimhean agus sunnd a tha 'lag'

Ged a dh’fhaodadh gu bheil ar dàimhean ri cloinn blàth is càirdeil, chan eil sinn a’ nochdadh tuigse dhomhainn gu leòr air sunnd, in-ghabhalachd no co-ionannachd. Mar thoradh air sin, chan eil clann a’ faighinn taic chunbhalach gus am bi iad a’ faireachdainn sàbhailte, air an urramachadh no air an gabhail a-steach. Tha cothroman gann do chloinn na beachdan aca a chur an cèill no pàirt a ghabhail ann an co-dhùnaidhean a bheir buaidh orra. Tha seo a’ toirt buaidh air am faireachdainn de bhuinteanas agus an sunnd fhaireachdainnean.

Taic uile-choitcheann a tha 'glè mhath'

Bidh sinn a’ toirt taic is brosnachadh air leth èifeachdach do gach pàiste gus dèanamh cinnteach gu bheil a h-uile duine air an gabhail a-steach. Tha cleachdadh in-ghabhalach air a thoirt a-steach air feadh ar solar uile-choitcheann, a’ toirt cothrom do chloinn le feumalachdan taice a bharrachd ionnsachadh fhaighinn ann an dòigh a tha ag obair dhaibh. Bidh cha mhòr a h-uile pàiste a’ com-pàirteachadh gu h-iomlan agus a’ gabhail pàirt ann an rannsachadh is cluich. Tha iad a’ faighinn taic le sàr eadar-obrachaidhean, eòlasan, cleachdadh cruthachail de dh’àitichean, agus teicneòlas.

Tha feumalachdan fa leth chloinne aig cridhe pròiseasan dealbhaidh is ath-bhreithneachaidh. Bidh sinn ag obair le teaghlaichean agus com-pàirtichean cudromach eile gu h-èifeachdach, gus làn aire a thoirt do dh’iomadachd fheumalachdan chloinne. Tha sinn a’ tuigsinn na deagh bhuaidh a dh’fhaodas a bhith aig co-obrachadh fìor èifeachdach air eòlasan chloinne, agus air na dòighean fa leth anns a bheil iad ag ionnsachadh.

Tha targaidean ionnsachaidh is leasachaidh pearsanta àrd-inbhe aig cloinn, a bhios a’ togail air ionnsachadh a bh’ aca roimhe. Bithear gan ath-sgrùdadh agus gan luachadh gu cunbhalach còmhla ri clann agus an teaghlaichean, agus com-pàirtichean cudromach eile.Thèid na h-ath cheumannan iomchaidh a chomharrachadh. Tha com-pàirteachasan làidir co-obrachail ann leis a h-uile duine a tha a’ toirt taic do chloinn, a’ gabhail a-steach aig prìomh amannan eadar-ghluasaid.

Taic uile-choitcheann a tha 'lag' (weak)

Chan eil sinn misneachail nar dleastanas, tràth-ionnsachadh is cùram-chloinne a thoirt seachad, a tha a’ gabhail a-steach a h-uile duine agus a tha stèidhichte air còraichean. Chan eil an solar againn a’ tabhann cothrom co-ionann do gach pàiste air eòlasan àrd-inbhe.

Chan eil sinn a’ dealbhadh no ag atharrachadh ionnsachadh gu cunbhalach gus coinneachadh ri feumalachdan chloinne fa leth. Chan eil sinn a’ cleachdadh àite no goireasan ann an dòigh a tha math gu leòr gus taic a thoirt do chom-pàirteachadh agus conaltradh. Tha com-pàirteachasan le teaghlaichean agus proifeiseantaich eile gann, agus tha seo a’ toirt buaidh air ar comas taic fhiosraichte, chunbhalach a thoirt seachad air feadh an t-suidheachaidh.

Comharrachadh agus measadh feumalachdan ionnsachaidh agus taic chuimsichte a tha 'glè mhath'

Thèid feumalachdan ionnsachaidh fa leth chloinne a chomharrachadh tràth, tro bheachd-sùla faiceallach agus mion-sgrùdadh èifeachdach air fiosrachadh measaidh làidir, bho raon de stòran. Tha seo a’ gabhail a-steach a bhith ag obair ann an com-pàirteachas dlùth le pàrantan agus co-obraichean gus làn aire a thoirt do dh’ionnsachadh agus feumalachdan chloinne roimhe seo.

Bidh sinn a’ dèanamh feum glè èifeachdach de na comharran sunnd nàiseanta gus luachadh iomlan a thoirt seachad air neartan agus feumalachdan taice chloinne. Bidh sinn a’ dèanamh cinnteach gu bheilear a’ comharrachadh clann le feumalachdan taice a bharrachd tràth agus gum bi iad a’ faighinn taic tro eadar-theachdan a tha air an dealbhadh gu math agus air an ath-sgrùdadh gu cunbhalach.

Tha luchd-obrach misneachail ann a bhith a’ cleachdadh raon de ro-innleachdan agus ghoireasan, a tha a’ gabhail a-steach a h-uile duine, gus coinneachadh ri feumalachdan eadar-mheasgte. Bidh sinn a’ dèanamh cinnteach gu bheil taic iomchaidh, co-rèireach ga lìbhrigeadh ann an deagh àm, a’ gabhail a-steach cuideachadh speisealta far a bheil feum air.

Bidh ar prìomh luchd-stiùiridh agus ar luchd-obrach a’ cumail gu h-iomlan ri riatanasan reachdail. Bidh sinn a’ toirt seachad taic àrd-inbhe agus cuimsichte do gach pàiste a dh’fheumas taic a bharrachd, a’ gabhail a-steach ruigsinneachd air teicneòlas didseatach, gus cnapan-starra a lughdachadh a thaobh in-ghabhail agus ionnsachadh.

Tha clann, teaghlaichean agus com-pàirtichean gu tur an sàs ann a bhith a’ dèanamh ath-sgrùdadh air adhartas chloinne agus a’ dèanamh cho-dhùnaidhean mu ionnsachadh agus taic san àm ri teachd. Tha eadar-theachdan cuimsichte gu math èifeachdach agus bidh iad a’ leantainn gu builean adhartach do chloinn.

Comharrachadh agus measadh feumalachdan ionnsachaidh agus taic chuimsichte a tha 'lag'

Chan eil an dòigh-obrach againn airson feumalachdan taice a bharrachd cloinne, a chomharrachadh agus a mheasadh, air a leasachadh gu leòr fhathast. Chan eil sinn an-còmhnaidh a’ cleachdadh fiosrachadh bho bheachd-sùla, no luachadh gu h-èifeachdach, gus tuigse iomlan a thogail air neartan agus feumalachdan chloinne. Mar thoradh air sin, chan eil taic chuimsichte an-còmhnaidh co-rèireach, ga lìbhrigeadh ann an deagh àm, no a’ freagairt gu math ri clann fa leth.

Chan eil sinn fhathast misneachail mu ciamar a choinnicheas sinn ri riatanasan reachdail. Tha sin a’ ciallachadh gum faod dìth soilleireachd, buaidh agus obair-leanmhainn a bhith san dealbhadh againn, agus tha sin a’ cuingealachadh comas air builean a leasachadh do chloinn.

In-ghabhaltachd agus co-ionannachd a tha 'glè mhath'

Tha sinn an-còmhnaidh a’ cur luach nar cloinn agus teaghlaichean, agus a’ dèiligeadh riutha gu coibhneil, spèiseil, cothromach.  Bidh sinn a’ brosnachadh agus a’ toirt taic do dh’in-ghabhail agus còraichean chloinne agus a’ brosnachadh a h-uile pàiste gu bhith an sàs gu h-iomlan ann am beatha an t-suidheachaidh.  Bidh ar luchd-obrach a’ cleachdadh teicneòlas gu fìor èifeachdach, gus leigeil le gach pàiste pàirt a ghabhail gu h-iomlan ann an saoghal a tha a’ sìor fhàs didseatach, agus gus taic a thoirt do chom-pàirteachadh theaghlaichean.

Tha sinn a’ cur luach air iomadachd agus a’ cur an aghaidh leth-bhreith.  Bidh ar luchd-obrach ag obair ann an com-pàirteachas le pàrantan/luchd-cùraim agus com-pàirtichean gus iomadachd adhartachadh agus taic a chur ris agus gus eòlasan chloinne a neartachadh. 

Tha an luchd-obrach glè eòlach air a h-uile pàiste agus teaghlach.  Tha sinn a’ tuigsinn a’ cho-theacsa shòisio-eaconamach, cultarail agus cànain aca. Bidh luchd-obrach a’ cleachdadh an fhiosrachaidh seo gus freagairt gu mothachail, le taic, aig an àm cheart.  Tha an taic seo a’ toirt aire do dh’fheumalachdan chloinne aig a bheil eòlas air cùram agus do dh’fheartan dìonta a h-uile pàiste is teaghlaich.  Tha ro-innleachdan air leth èifeachdach againn gus adhartas a leasachadh airson a h-uile pàiste.Tha fòcas soilleir air an fheadhainn a tha a’ fulang dùbhlan no bacaidhean a thaobh an ionnsachaidh no an in-ghabhaltachd.

In-ghabhaltachd agus co-ionannachd a tha 'lag'

Chan eil sinn fhathast a’ nochdadh dealas làidir a thaobh in-ghabhaltachd agus co-ionannachd ann am beatha is obair an t-suidheachaidh.  Chan eil clann le feumalachdan taice a bharrachd an-còmhnaidh air an gabhail a-steach gu h-iomlan. Chan eil sinn a’ gabhail cheumannan èifeachdach gus cnapan-starra a thaobh com-pàirteachadh a lughdachadh.  Chan eil sinn an-còmhnaidh ag aithneachadh no a’ freagairt ri leth-bhreith, agus chan eil sinn a’ dèanamh feum èifeachdach de dhàta no co-theacsa ionadail gus fiosrachadh a thoirt do chleachdadh cothromach.

Faodaidh na ceistean dùbhlain a leanas taic a thoirt do dh’fhèin-luachadh:

• Gu dè an ìre a bhios ar dòighean-obrach a thaobh in-ghabhaltachd agus co-ionannachd a’ toirt buaidh mhath air sunnd chloinne?

• Dè cho math ’s a tha sinn a’ coinneachadh ri feumalachdan chloinne fa leth, a’ gabhail a-steach an fheadhainn a tha a’ fulang dùbhlan a bharrachd?  Dè cho èifeachdach ’s a tha ar dòigh-obrach a thaobh dealbhadh airson clann a dh’fheumas taic a bharrachd?

• Dè cho èifeachdach ’s a tha sinn a’ toirt a-steach pàrantan/luchd-cùraim agus com-pàirtichean ann a bhith a’ dealbhadh agus a’ lìbhrigeadh taic chuimsichte do chloinn fa leth?  Dè na dòighean anns a bheil sinn a’ toirt a-steach clann, pàrantan/luchd-cùraim agus com-pàirtichean ann a bhith a’ dèanamh ath-sgrùdadh air buaidh taic chuimsichte?

• Dè na dòighean anns a bheil sinn a’ toirt taic do chloinn aig prìomh phuingean eadar-ghluasaid gus dèanamh cinnteach mu leantainneachd ann an sunnd agus in-ghabhaltachd?

• Dè cho èifeachdach ’s a tha na dòighean-obrach againn a thaobh builean a leasachadh do chloinn?  Gu dè an ìre a bhios iad sin air an daingneachadh le bhith ga fhaighinn ceart airson gach leanabh?

• Dè cho math ’s a tha tuigse againn air Cùmhnant nan Dùthchannan Aonaichte air Còraichean Chloinne (UNCRC) agus ciamar a tha e air a fhreumhachadh nar cleachdadh?

• Gu dè an ìre a bhios sàr ionnsachadh proifeasanta cunbhalach againn gus taic a thoirt do shunnd, in-ghabhaltachd agus co-ionannachd?  Dè a’ bhuaidh a th’ aig an t-ionnsachadh phroifeasanta seo?

• Gu dè an ìre a bhios tuigse chuimsichte, cho-roinnte againn air ar dleastanasan reachdail, gus taic a thoirt do gach pàiste?

• Dè na dòighean anns a bheil sinn a’ brosnachadh chloinne gus sgrùdadh a dhèanamh air na faireachdainnean, na beachdan, na luachan agus na creideasan a bheir buaidh air am beatha ann an dòigh a tha iomchaidh a thaobh an leasachaidh?

• Gu dè an ìre a bhios ar cleachdadh a’ cruthachadh feallsanachd a nì cinnteach mu cho-ionannachd agus a tha a’ comharrachadh iomadachd?