Ceannardas agus riaghladh luchd-obrach agus ghoireasan

Lèirsinn, luachan agus amasan a tha 'glè mhath'

Bidh sinn a’ brosnachadh, a’ cumail suas agus air leth dealasach a thaobh lèirsinn cho-roinnte a tha a’ nochdadh nan ìrean as àirde airson cloinn, teaghlaichean, com-pàirtichean agus a’ choimhearsnachd nas fharsainge. Tha clann is teaghlaichean air an gabhail a-steach gu gnìomhach ann an dealbhadh agus ath-sgrùdadh ar lèirsinn, ar luachan agus ar n-amasan. Tha iad sin a rèir àrd-mhiannan ar cloinne agus ar teaghlaichean. Tha seo a’ dèanamh cinnteach gu bheil leasachaidhean sam bith a tha san amharc a’ toirt aire iomchaidh do chòraichean, ùidhean, cheistean, fheumalachdan agus roghainnean chloinne.

Bidh luchd-stiùiridh a’ cruthachadh àrainneachd far a bheil a h-uile duine a’ faireachdainn misneachail a thaobh atharrachadh fiosraichte a thòiseachadh agus uallach a ghabhail airson a’ phròiseis. Cuidichidh seo sinn a’ tuigsinn dè tha cudromach nuair a thathar a’ coinneachadh ri feumalachdan chloinne is theaghlaichean. Bidh conaltradh èifeachdach a’ dèanamh cinnteach à sealladh soilleir air ar lèirsinn, ar luachan agus ar n-amasan gus am bi an sgioba luchd-obrach nas fharsainge, clann is teaghlaichean air an toirt a-steach ann a bhith gan coileanadh.

Tha ar luachan air an cur an sàs ann am beatha làitheil an t-suidheachaidh agus a’ toirt buaidh air ar cleachdadh. Tha ceannardas stèidhichte gu soilleir air prionnsabalan sàr chùram-chloinne is ionnsachaidh, conaltradh gnìomhach le cloinn agus an teaghlaichean, agus cultar deagh chàileachd.

Lèirsinn, luachan agus amasan a tha 'lag'

Chan eil ar lèirsinn, ar luachan no ar n-amasan soilleir. Chan eil iad air an cruthachadh gu h-èifeachdach le clann, teaghlaichean, com-pàirtichean agus a’ choimhearsnachd nas fharsaing, no air an conaltradh riutha gu h-èifeachdach. Chan eil ach beagan fòcais againn air cudromachd leasachaidh.

Chan eil clann is teaghlaichean a’ faighinn seirbheis a tha a rèir nam miannan co-roinnte aca. Chan eil fios aig a h-uile duine a tha an sàs san t-suidheachadh air ar lèirsinn, ar luachan agus ar n-amasan, no air an dreuchd aca fhèin ann a bhith gan adhartachadh. Chan eil taic aig ar luchd-obrach gus meòrachadh air an lèirsinn, na luachan agus na h-amasan ann an dòigh bhrìoghmhor, agus mar sin chan eil iad sin air an nochdadh nan cleachdadh.

Chan eil mòran buaidh aig atharrachaidhean, a thèid a dhèanamh air ar cleachdadh agus air an t-suidheachaidh, air cloinn is teaghlaichean. Tha strì an aghaidh atharrachadh ann a bheir droch bhuaidh air ar comas builean nas fheàrr a lìbhrigeadh. Tha cothroman gan call airson meòrachadh agus atharrachadh adhartach a thoirt gu buil airson cloinn, teaghlaichean agus a chèile.

Fèin-luachadh, dearbhadh càileachd agus cur an gnìomh atharrachadh a tha 'glè mhath'

Le fèin-luachadh amasach a tha air a dhèanamh gu ciallach, is urrainn dhuinn cùram is ionnsachadh àrd-inbhe a lìbhrigeadh a tha freagarrach do dh’fheumalachdan is roghainnean chloinne is theaghlaichean. Bidh sinn a’ dèanamh cinnteach gu bheil beachdan chloinne, theaghlaichean is chom-pàirtichean a’ fiosrachadh leasachadh agus gu bheil iad aig cridhe ar pròiseas fèin-luachaidh.

Bidh ar luchd-stiùiridh a’ sealltainn far a bheil na beachdan sin a’ fiosrachadh atharrachaidh, agus a’ dèanamh cinnteach à leasachadh agus builean adhartach do chloinn is do theaghlaichean. Bidh sinn a’ meòrachadh còmhla agus a’ cleachdadh nam meòrachaidhean sin gus atharrachadh adhartach a thoirt gu buil.

Tha inbhean agus dùilean aontaichte aig ar gnìomhan dearbhadh càileachd agus modarataireachd, a tha a’ gabhail a-steach sgrùdadh agus cruinneachadh dàta aig an àm cheart, a tha gach ball den luchd-obrach a’ tuigsinn. Tha fianais air a chleachdadh gu h-èifeachdach gus co-dhùnaidhean a dhèanamh mu chàileachd an t-solair agus gus dòighean-obrach leasachaidh iomchaidh a chomharrachadh.

Tha atharrachadh seasmhach a’ tachairt airson gu bheil an t-astar atharrachaidh iomchaidh. Tha cleachdadh air leth èifeachdach air a chomharrachadh agus air a cho-roinn taobh a-staigh agus taobh a-muigh na seirbheis gus leasachaidhean a chur air adhart a tha air leantainn gu builean adhartach do chloinn.

Bidh luchd-stiùiridh a’ dèanamh cinnteach gu bheil sàr ionnsachadh tro chluich aig cridhe dealbhadh leasachaidh. Tha leasachadh, soirbheachas agus coileanadh leantainneach airson a h-uile pàiste aig cridhe cur an gnìomh ro-innleachdan leasachaidh. Tha iad sin buntainneach do chomhairle ionadail, nàiseanta agus eadar-nàiseanta, agus thathar a’ cleachdadh rannsachadh gu h-èifeachdach gus taic a thoirt do nan atharrachaidhean smaoineachail.

Fèin-luachadh, dearbhadh càileachd agus cur an gnìomh atharrachadh a tha 'lag'

Tha ar fèin-luachadh airson leasachadh aig ìre thràth agus mar thoradh air sin is ann ainneamh a bhios ar leasachaidhean no atharrachaidhean air cleachdadh air an cumail suas. Chan eil clann is teaghlaichean an sàs gu brìoghmhor anns a’ phròiseas fèin-luachaidh againn. Mar thoradh air sin, chan eil iad a’ faireachdainn gu bheil iad fiosraichte mu atharrachaidhean no carson a tha iad a’ tachairt.

Chan eil ar clann agus ar teaghlaichean a’ faighinn cùram sàbhailte de dheagh chàileachd air sgàth planadh leasachaidh neo-chunbhalach agus neo-èifeachdach. Tha dìth sgilean agus comais san sgioba againn a’ cur bacadh air ar comas taic a thoirt do leasachaidhean agus an stiùireadh gu h-èifeachdach.

Chan eil sinn a’ toirt cothrom èifeachdach do luchd-obrach no do theaghlaichean gearanan a thogail no leasachaidhean a mholadh le misneachd. Chan eil luchd-stiùiridh a’ freagairt gu sgiobalta ri fios-air-ais, agus mar sin tha atharrachadh ro shlaodach airson leasachaidhean a thoirt gu buil.

Cha deach cothrom a ghabhail gus raon de chom-pàirtichean a thoirt a-steach no a chleachdadh gus fiosrachadh a thoirt don phlanadh leasachaidh againn. Tha sinn air iomall chùisean agus is dòcha nach eil sinn eòlach air beachdan nàiseanta mar thoradh air sin. Tha beàrnan mòra anns na raointean a tha còmhdaichte leis na siostaman dearbhadh càileachd againn. Chan eileas a’ comharrachadh neo-chunbhalachd ann an cleachdadh gu h-iomlan agus chan eil sin a’ sealltainn far a bheil raointean airson leasachadh. Mar thoradh air sin, tha eòlasan agus builean chloinne bochd, leis nach eil neo-chunbhalachd ann an cùram air a chomharrachadh gu h-iomlan agus chan eil sin a’ sealltainn far a bheil raointean airson leasachadh.

Trusadh is inntrigeadh luchd-obrach a tha 'glè mhath'

Tha luchd-stiùiridh ag aithneachadh cho cudromach ’s a tha e sgioba seasmhach is sgileil a thrusadh agus a chumail airson sunnd chloinne is luchd-obrach.

Tha luchd-obrach air an trusadh ann an dòigh a tha stèidhichte air gach roinn de chleachdaidhean fastaidh nas sàbhailte. Bidh luchd-stiùiridh a’ dèanamh cinnteach gu bheil luchd-obrach ùr air an trusadh gu sàbhailte agus gu bheil iad a’ tuigsinn an dleastanasan san sgioba. Bidh sinn a’ toirt prìomhachas do thrusadh stèidhichte air luachan le bhith a’ conaltradh gu soilleir na luachan as cudromaiche dhuinn agus a’ beachdachadh a bheil luachan nan tagraichean a’ co-thaobhadh. Tha cothroman aig cloinn is teaghlaichean a bhith an sàs sa phròiseas ann an dòigh bhrìoghmhor. Tha iad air an cumail fiosraichte agus air an cur an aithne luchd-obrach ùr no sealach.

Tha prògraman inntrigidh againn a tha mionaideach agus sònraichte do gach neach gus coinneachadh ris na diofar dhleastanasan san sgioba. Bidh luchd-stiùiridh a’ dèanamh cinnteach gu bheil luchd-obrach ùr misneachail ann a bhith a’ coinneachadh ri feumalachdan chloinne fa leth. Bidh sinn a’ cleachdadh raon de ghoireasan, a’ gabhail a-steach ‘Tràth-ionnsachadh agus cùram-cloinne: goireas inntrigidh nàiseanta’, gus luchd-obrach ùr agus an fheadhainn ann an dreuchdan ùra uidheamachadh leis an eòlas agus na sgilean a tha riatanach airson cùram àrd-inbhe a thoirt do leanabanan is clann.

Tha pròiseasan soilleir againn airson luchd-obrach a mheantoradh agus a chuideachadh, le ùine air a riarachadh gus seo a thoirt air adhart. Tha meantoran soilleir mu na dreuchdan agus na dleastanasan aca, agus tha fiosrachadh sgrìobhte aca air am faod iad coimhead. Còmhla, tha na dòighean-obrach seo a’ toirt taic do bhuilean àrd-inbhe airson a h-uile pàiste.

Trusadh is inntrigeadh luchd-obrach a tha 'lag'

Dh’fhaodadh na modhan trusaidh leas no sàbhailteachd chloinne a chur ann an cunnart. Dh’fhaodadh eileamaidean chudromach den phròiseas a bhith air an dearmad. Mar eisimpleir, sgrùdadh bheàrnan ann an eachdraidh cosnaidh no clàran smachdachaidh; no leigeil le luchd-obrach tòiseachadh ag obair mus tèid na sgrùdaidhean riatanach uile a dhèanamh no fhaighinn.

Chan eil anns a’ phròiseas inntrigidh againn ach aon thachartas a tha ag amas air poileasaidhean agus modhan-obrach a mhàin. Chan eil mòran aire ga thoirt do dh’fheumalachdan cùraim, taice agus ionnsachaidh chloinne. Mar thoradh air sin, chan eil am fiosrachadh gu lèir a dh’fheumas luchd-obrach ùr, gus cùram agus taic a thoirt do chloinn gu sàbhailte, aca.

Chan eil rèiteachaidhean meantoraidh, ma tha iad ann idir, air an deagh bheachdachadh agus chan eil iad a’ toirt taic do luchd-obrach gus an dreuchd aca a thuigsinn nas fheàrr. Chan eil ùine gu leòr air a thoirt do luchd-obrach a tha a’ gabhail os làimh dreuchdan meantoraidh gus seo a dhèanamh gu math.

Faodaidh na ceistean dùbhlain a leanas taic a thoirt do dh’fhèin-luachadh:

• Dè cho èifeachdach ’s a tha sinn a’ toirt a-steach daoine eile gus lèirsinn agus adhbhar co-roinnte a leasachadh airson ar suidheachaidh?

• Dè cho math ’s a tha ar lèirsinn, ar luachan agus ar n-amasan a’ toirt buaidh air ar cleachdadh làitheil?

• Dè a’ bhuaidh a th’ aig ar lèirsinn, ar luachan agus ar n-amasan air leasachadh càileachd an tràth-ionnsachaidh agus a’ chùram-cloinne a bheir sinn seachad?

• Ciamar a tha fios againn gu bheil na pròiseasan dearbhadh càileachd againn a’ leasachadh bhuilean do chloinn is do theaghlaichean?

• Dè cho math ’s a tha luchd-obrach a’ tuigsinn an dleastanas a th’ orra a thaobh leasachadh tro fhèin-luachadh?

• Gu dè an ìre a bhios cumhachd aig luchd-obrach gus atharrachaidhean a dhèanamh?

• Ciamar a tha sgrìobhainnean deagh-chleachdaidh agus stiùireadh nàiseanta air an leantainn gu leasachadh ann an eòlasan agus

  builean chloinne?

• Ciamar a chleachd sinn guthan chloinne gus ar cleachdadh agus ar solar a luachadh agus fhiosrachadh?

• Ciamar a bhios sinn a’ toirt ar teaghlaichean is cloinn an sàs gus dèanamh cinnteach gu bheil pàirt aca san turas leasachaidh againn?

• Ciamar a nì sinn cinnteach gu bheil pròiseasan trusaidh luchd-obrach a’ nochdadh deagh chleachdadh làithreach agus stiùireadh nàiseanta?

• Dè na dòighean anns a bheil sinn a’ dèanamh cinnteach gu bheil am pròiseas trusaidh againn a’ tàladh dhaoine leis na luachan, na sgilean agus an t-eòlas ceart airson na dreuchd?

• Ciamar a nì sinn cinnteach gu bheil na pròiseasan inntrigidh againn air an dealbhadh gus coinneachadh ri feumalachdan dhiofar dhreuchdan is dhleastanasan luchd-obrach?